Adim tarvotti tarvachi viaj marun aile mhonnttoch .....[Niallunk]

www.goa-world.com presentation

Aitaracheo Kaskuleo:

Somzonechi Chuk Zata Tedna.....


Adim tarvotti mama -avoicho bhav; vo bapaicho bhav-titiv; vo mavxecho ghov-uncle; tarvachi viaj marun aile mhonnttoch tangelea lagxilea soireani, poilim tanchea ghora vochun bhett diunk zai asli. Ho ek kaido nhoi aslo ponn oxem ek nattem (relationship) adim cholltalem. Bhonink kedna kai tarvotti bhavacher dixtt ghalunk distalem zalear bhav, bhoinichea ieneank ravtalo. Adlea mon'xam sovem oput somzuch ani maia vostali ti aichea kallar disona.



Ponn atam? Tarvar, Gulfant, Londonant, vo Amerikent savn tum kedna sutt'ten ghora pavlo to, tujea soireank nhoi mhonn tujea xezareank khobor asona. Adim, ek mhoino fuddench ganvant dhas poddtali konn, khoimchea vaddeantlo tarvotti pavta poi to. Choddan chodd hi khobor ganvantlea sorea pompar vochpi mon'xank melltali. Tum Goeam pavchea adinch tujea nanv tablam tornamentachea ollir (list-ar) astalem. Ani zori tor tum, tuji tank pompar bhorpi zalear thoimsor 'truuk' (ek kardamcho khell) tujo time pass korunk gavantle khellkoddi ravtale.

Atamchea kallar sorea bar-amcher bhett korinant tosleanchi khobor gheunk mat, ghora koden panch vo so klubachea mon'xancho zomo pavta.

Donparchea vellar ganvchea klubache vangddi tujea ghorant gustele. Tannim tuka Aitarachea Misar, igorjent polelolo. Tuje adle ixtt te. Adim tum ankvar astana tanchea bharim astalo. Logn zatokoch tujea home minister-an (vach-bailen) tuka zaito sudrailo, dhekunuch tum adim heddttalo toso atam heddona. Aileo-poileo khobro kaddlea uprant tuka thoddoso pomp martale ani loje kama khatir duty free shop-ar thavn haddleli Black Label whisky tum ugoddtolo ani whisky ghonttanam tonddan ghalunk kaim badam-pista kaddtolo.

Tuje, don peg zale mhonnttoch tannim achi-tachi tokhnnai korchi ani tatunt tukai uklun dovortele. Shri Ximbro Goeant ailelea pavtti klubak donation dita ani Shrimati Fidelina-n ghele khepek stage ani sound proskrut (sponsor) korunk sat hozar rupia dile mhonn tujea kanar saddoitat. Tum tin ankdde choddoun dha hozar rupianim don songit pongodd free beat show-ak ube korta. Ughoddleli Black Label sompoilea ani tuvem bhasailelem gheun tujea bhuzar hat marit "thank you" mhonnon gheleat.

Arre bap re! Mhoji survat zali eke vixaicher ani hanv xirkovlom dusreach vicharancher. Hanv sangunk soddtalom atam konnui pordesant sakun ailo zalear tannem aplea khudd bhoinichea, bhavache vo soireanchea khobrek vechem poddta. Protek ghorant TV-cher serial cholltolean nhoi fokot soirim, xezarim ponn ghorantloch lok eka-mekhachi khobor gheun visorla mhollear fott zavnchina. Tujea soireank bhett divnk dislem tor tanchea ghora vetana tujea hantan borixi pezad pottli asleruch tuka motto ievkar melltta na tor durlokx (careless) kelo mhonn sozmuchem.

Ponn kaim monis prani toxi asona. Tankam aplea kuttumbachea vo ixtt-mitrancho, soireancho mog ani husko asta. Tantli mhoji ek, vhoddlea bhavachi dhuv. Tika gavantuch logn kel'li kori ponn bakericho dhondo cholltolean tancho rabito Vasku xarant zalolo. Logn zalea uprant chear vorsanim tika ek babulo zolmololo ani hanv sutt'tean Goeam pavlo mhonn aikonam fuddem aplea dhaktea porak hanvem pollevncho mhonn mudd'dom amchea ghora aileli tea vellar mhaka kolit kelem, tannim don kuddachem flat ghetlam ani Vasku xharant hanv pavon sorlo tor tanchea novea flat-ak bhett diunk vinoilem.

Kaim ghorze kama khatiruch mhaka Vasco vochunk poddlelem. Mhojem kam' sompoilea uprant tinnem dilolea pott'ttear vochun bildinga sokoll motor thamboili. Motorintlo dhevun lift-tin bhitor soron tisre mozlacho (floor-acho) butanv dhamlo. Bara ankddeachea daracher 'Jack-Daisy' oxo toktto aslo. Sarkhi topasnni kortoch ghant'ticho butanv dhamblo.

Dar sovkas ugttem zalem. Darar, gagro nhesun ek moddlea piraechi bail ubhi. Bhavache dhuven sanglelem, ek vhoili (Andra Pradesh) nokranni tinger kamank asa mhonn.


"Tumi konnank soddtat?", tinnem luan vicharlem. Tichem vicharop mhaka ekdom pottlem. Hindinlean, vhoddilank respetan mhonnttat 'App'. Ti ek on-Goenkarn (non-Goan) asunui Konknni xud'dh uloileli aikon anik ek panch vorsani amchea bhagarachea Goeant konn khoro Goenkar tem ollkunk moskil zatelem. Devak argham, tanchea nhesnacho pattern mat Goeamkar ostoream sarkelo mottvo zaunk nant. Atam mhaka khobor na ti aple madamik vo mhoje bhavache dhuvek kitem mhonnon ulo korta ti. Choddan chodd 'bai' hea utran ulo kortat mhonnttoch hanvem tichea thaim vicharlem

"Bai na?"

Tichea tonddacho rong bodollo. Tinnem tokli soklla ghatli ani paimchim don panvlam fattim gheun dar bond korunk vetali.

"Excuse me, hanvem tujea thaim vicharlam bai na?"

Hanv ek kholnaik (villain) zall'le bhaxen tinnem ragist motte dolle korun bhitorle tiddken mhonnttlem

"Adim oi, atam na. 'Baina' asleleank adlea Mhukel Montrean Ribanddar pattovleant. Mhoji 'bakarn' ani 'patrao' ghorant nant",

Ani rostin, tinnem dar bond kelem.


Lino B. Dourado
www.goa-world.com/goa/poems/ 20/02/2005
Email: libado23s53@...

(c) All rights reserved, www.goa-world.com